De Mesmer vun Kniis war beim Mitruş schlachte. Schun morjets hot e brenzlicher Geruch in der Luft gelee. Die Rumänre brenne ehre abgstochne Schwein un des soll sogar e bessre Speck gewwe, behaupte manche Feinschmecker. Aah Schwowe, die wu ehre Schwein briehe un abschawe, hun des schun behaupt.

Der Schlachttach beim Mitruş is eigentlich ohne besondere Vorkommnisse verlaaf. Oweds hot’s sogar e Sautanz gewwe. Merr hot mit de Johre halt des oone un annre bei de Schwowe gsiehn un des, was merr forr gut ghal hot, noh aah iwernomm. Des gheert sich aah so, wu meh Natione in oom Dorf lewe.

Nateerlich is wie uf jedem Sautanz, ob schwowisch, rumänisch, zigeinrisch, serwisch odder ungarisch, net norr gut gess wor, de Hausherr hot aah gut ingschenkt. Die Schlachter hun rum de Kichetisch gsitzt un fleißich gebechert. Es is schun geger Mitternacht gang, wie’s uf mol brenzlich geroch hot.

De Mesmer vun Kniis war de oonzig wu de Iwerblick noch net ganz vlor hatt. Er hot sich gedenkt, bevorsch’d Alarm schlast, schaust dich es erscht mol in deiner Umgebung um. Weil er allerdings ah schun nemi so hunnert prozentich klor im Kopp war, hot’s schun e paar Minute gedauert, bis er bemerkt hot, dass am anre Enn vum Tisch oone vun de Schlachtre fehlt. Mensch, hot er sich gedenkt, wann ich noch net stiwlsteifpsoff sin, no steit doch newrem GhiÈ›ă ganz feiner Rauch in die Heeh.

Do hot er schun noch gut gsiehn, de Mesmer vun Kniis. De Vasile war umgekippt un hot mit seim Kopp uf’m GhiÈ›ă seim Schoß gschlof. Die Äsch vum GhiÈ›ă seim Mărăşeşti is’m Vasile ins Ohr gfall un dort ware Hoor genuch zum absenke. Des hot halt so geroch wie am Morjet beim Saubrenne.